|
Mae Uned Troseddau Economaidd Heddlu Gogledd Cymru yn rhybuddio'r cyhoedd am hysbysebion ar-lein sy'n cynnig gemwaith moethus "am ddim", lle gofynnir i gwsmeriaid dalu costau postio neu brosesu yn unig (fel arfer rhwng £15 a £30 neu fwy). Mae'r hysbysebion yma’n cael eu gweld yn aml ar Facebook, Instagram, TikTok, a marchnadoedd ar-lein, ac maent yn aml yn honni fod busnes yn cau, fod y perchnogion yn ymddeol, neu fod stoc yn cael ei rhoi i ffwrdd fel rhan o hyrwyddiad arbennig. 🔵 Sut Mae'r Sgam yn Gweithio
Mae twyllwyr yn denu prynwyr gyda chynigion o emwaith sy'n cael ei disgrifio’n werthfawr am £0, gyda'r unig gost yn ymddangos fel tâl dosbarthu. 🔵 Mewn gwirionedd:
• Mae'r gost postio yn aml yn uchel ac yn cynnwys elw'r gwerthwr.
• Yn aml, mae'r gemwaith a dderbynnir yn emwaith rhad wedi'i wneud o aloi, plastig neu bres, sydd werth ychydig iawn, ac sy'n cael ei anfon yn uniongyrchol gan gwmnïau o dramor.
• Mae rhai gwefannau yn ceisio cofrestru cwsmeriaid ar gyfer tanysgrifiadau cylchol neu daliadau cudd wrth gwblhau'r pryniant. 🔵 Arwyddion Rhybudd
🚩 Cynigion "Talu am y postio yn unig" ar gyfer gemwaith drud. Nid yw gwerthwyr a chwmniau dilys yn rhoi stoc gwerthfawr i ffwrdd tra'n codi £20 neu fwy am gostau postio.
🚩 Straeon emosiynol am gwmnïau’n cau lawr neu ymddeoliad.
🚩 Clociau cyfrif i lawr a rhybuddion am "stoc gyfyngedig" wedi'u cynllunio i greu teimlad o frys.
🚩 Diffyg manylion cwmni y gellir eu gwirio, cyfeiriad busnes neu fanylion cyswllt.
🚩 Delweddau a gynhyrchir gan AI a hysbysebion sy'n edrych yn rhy berffaith neu'n rhy dda i fod yn wir. 🔵 Amddiffynnwch Eich Hun
✅ Ymchwiliwch i'r gwerthwr cyn gwneud pryniant.
✅ Gwiriwch adolygiadau annibynnol o sawl ffynhonnell.
✅ Darllenwch y dudalen dalu'n ofalus am unrhyw daliadau cudd neu danysgrifiadau ychwanegol.
✅ Talwch â cherdyn credyd lle bo modd. 🔵 Os Ydych Wedi Cael Eich Effeithio
• Cysylltwch â'ch banc neu ddarparwr cerdyn ar unwaith. Efallai y gallwch wneud cais am ‘Chargeback’ neu hawlio arian yn ôl o dan Adran 75 Deddf Credyd Defnyddwyr (os yw gwerth y taliad unigol yn fwy na £100 ar gerdyn credyd).
• Gwiriwch eich cyfrif am daliadau cylchol neu daliadau anawdurdodedig eraill.
• Rhowch wybod am y twyll drwy Report Fraud (canolfan genedlaethol y DU ar gyfer adrodd am dwyll a throseddau seiber): https://www.reportfraud.police.uk/ neu ffoniwch 0300 123 2040.
• Rhowch wybod am yr hysbyseb neu'r rhestriad twyllodrus yn uniongyrchol i'r llwyfan sy'n ei gynnal (Facebook, Instagram neu TikTok) er mwyn helpu i'w dynnu i lawr. ❗ Os yw cynnig yn ymddangos yn rhy dda i fod yn wir, mae'n debygol iawn ei fod! #SeiberDdiogelHGC | 
