⚠️ Beware of fraudsters impersonating police officers / Gwyliwch allan am dwyllwyr sy’n esgus bod yn swyddogion yr heddlu. ⚠️

?? Gwyliwch allan am dwyllwyr sy’n esgus bod yn swyddogion yr heddlu. ??

Mae Heddlu Gogledd Cymru wedi derbyn adroddiadau’n ddiweddar am dwyllwyr yn dynwared swyddogion yr heddlu. Maen nhw’n honni eu bod yn ymchwilio i gyfrifon arian ‘crypto’ dioddefwyr, neu fod angen diogelu cyfrif banc y dioddefwr oherwydd bod unigolyn o dan amheuaeth yn y ddalfa.

Mewn digwyddiad diweddar, honnodd y twyllwr ei fod yn Dditectif Brif Arolygydd o’r Heddlu Metropolitan, oedd yn cysylltu ynglŷn â phroblemau honedig gyda chyfrif arian crypto’r dioddefwr. Ar ôl y sgwrs ffôn, mi anfonwyd neges e-bost sbam efo’r nod o wneud i’r twyll ymddangos yn ddilys. Yn ffodus, sylwodd yr aelod o’r cyhoedd ar arwyddion o dwyll, rhoddodd y ffôn i lawr ac ni ymatebodd i’r neges e-bost a ddilynodd.

Mae troseddwyr yn aml yn manteisio ar awdurdod a natur brys y sefyllfa er mwyn ennill ymddiriedaeth.

Dyma rai arwyddion rhybudd cyffredin:

✅ Cyswllt annisgwyl ynglŷn â buddsoddiadau, arian crypto neu gyfrifon banc.

✅ Ymgais i gael manylion personol neu ariannol.

✅ Rhoi pwysau arnoch chi i weithredu’n gyflym.

✅Negeseuon e-bost sy’n cynnwys dolenni, atodiadau neu geisiadau i ddilysu manylion cyfrifon.

Os ‘da chi’n derbyn galwad o'r fath:

· Rhowch y ffôn i lawr ar unwaith.

· Peidiwch â rhoi unrhyw wybodaeth bersonol nag ariannol.

· Peidiwch â chlicio ar unrhyw ddolenni mewn negeseuon e-bost sy’n dilyn.

· Dilyswch y cyswllt drwy sianeli swyddogol.

· Riportiwch unrhyw weithgarwch amheus i Report Fraud.

Cofiwch: ni fydd swyddogion heddlu go iawn yn eich ffonio chi na’n rhoi pwysau arnoch chi i drosglwyddo arian, nac i ddatgelu manylion personol neu ariannol sensitif. Os nad ydy rhywbeth yn teimlo’n iawn, ymddiriedwch yn eich greddf a dilyswch yn annibynnol cyn gweithredu.

#SeiberDdiogelHGC